លោក ឧត្ដម សេនីយ៍ទោឡោ ម៉េងហួត បានអញ្ជើញគោរពវិញ្ញាណក្ខន្ធ សព លោកវរសេនីយ៍ត្រី ស្វាយ សារិទ្ធមេបញ្ជាការរងកងអនុសេនាធំ នៃកងការពារព្រំដែនគោកលេខ៥០១ដែលបានពលីជីវិតដ៏អង់អាចក្លាហាននៅលើសមរភូមិប្រយុទ្ធការពារបូរណភាពទឹកដី ដែនអធិបតេយ្យជាតិ

ខេត្តពោធិ៍សាត់៖នាព្រឹកថ្ងៃទី ១២ ខែធ្នូ ឆ្នាំ ២០២៥ នេះ លោក ឧត្ដម សេនីយ៍ទោឡោ ម៉េងហួត បានអញ្ជើញគោរពវិញ្ញាណក្ខន្ធ សព លោកវរសេនីយ៍ត្រី ស្វាយ សារិទ្ធមេបញ្ជាការរងកងអនុសេនាធំ នៃកងការពារព្រំដែនគោកលេខ៥០១ដែលបានពលីជីវិតដ៏អង់អាចក្លាហាននៅលើសមរភូមិប្រយុទ្ធការពារបូរណភាពទឹកដី ដែនអធិបតេយ្យជាតិ និងខ្សែបន្ទាត់ព្រំដែនភូមិសាស្ត្រ ឃុំថ្មដា នាជន្មាយុ៤៥ឆ្នាំ នៅគេហដ្ឋាននៃសព ស្ថិតនៅភូមិបន្ទាយក្រង ឃុំអន្លង់ត្នោត ស្រុកក្រគរ ខេត្តពោធិ៍សាត់។

មរណភាពរបស់លោកវរសេនីយ៍ត្រី ស្វាយ សារិទ្ធ មេបញ្ជាការរងកងអនុសេនាធំនៃកងការពារព្រំដែនគោកលេខ៥០១ គឺជាការបាត់បង់ដ៏ធំធេងនូវស្វាមី ជាឪពុកបង្កើត ជាបងប្រុស និងញាតិមិត្ត នៃក្រុមគ្រួសារ ប្រកបទៅដោយសង្គហធម៌ និងព្រហ្មវិហារធម៌ ហើយក៏ជាការបាត់បង់នូវឥស្សរជនយោធាជួរមុខស្នេហាជាតិដ៏ឆ្នើមមួយរូប ដែលមានគុណូបការៈដ៏ធំធេង ក្នុងការវាយប្រយុទ្ធនៅលើសមរភូមិ ពីខ្មាំងសត្រូវសៀមឈ្លានពាន ដើម្បីការពារជាតិមាតុភូមិជាទីស្នេហា។ វីរភាពដ៏អង់អាចក្លាហាន និង ពលិកម្មដ៏ធំធំធេងបស់លោកវរសេនីយ៍ត្រី ស្វាយ សារិទ្ធ មេបញ្ជាការរងកងអនុសេនាធំនៃកងការពារព្រំដែនគោកលេខ៥០១ គឺជាមហាកិត្តិយសដ៏ឧត្តុង្គឧត្តមសម្រាប់ ជាតិ សាសនា ព្រះមហាក្សត្រ ដែលយើងទាំងអស់គ្នា រួមទាំងប្រជាពលរដ្ឋខ្មែរគ្រប់មជ្ឈដ្ឋាន សូមកត់ត្រា និងចងចាំទុក នូវគុណូបការៈដ៏ធំធេងនេះ។

ស្ថិតក្នុងក្ដីវិយោគដ៏សែនសោកសង្រេងនេះ លោក ឧត្តមសេនីយ៍ទោឡោ ម៉េងហួត សូមចូលរួមរំលែកទុក្ខដ៏ក្រៀមក្រំ និងដោយសេចក្តីសង្វេគជាទីបំផុត និងសូមឧទ្ទិសបួងសួងដល់ដួងវិញ្ញាណក្ខន្ធរបស់ លោកវរសេនីយ៍ត្រី ស្វាយ សារិទ្ធមេបញ្ជាការរងកងអនុសេនាធំនៃកងការពារព្រំដែនគោកលេខ៥០១ សូមបានចាប់បដិសន្ធិក្នុងសុគតិភពគ្រប់ៗ ជាតិ កុំបីឃ្លៀងឃ្លាតឡើយ។ ក្នុងនោះ លោកឧត្តមសេនីយ៍ទោ បាននាំយកនូវថវិកាចំនួន ៣ លានរៀល ចូលរួមបុណ្យដល់ក្រុមគ្រួសារសពលោកវរសេនីយ៍ត្រីស្វាយ សារិទ្ធមេបញ្ជាការរងកងអនុសេនាធំនៃកងការពារព្រំដែនគោកលេខ៥០១ ផងដែរ៕