ខេត្តពោធិ៍សាត់៖ ភាគីម្ចាស់រថយន្តម៉ាក HYUNDAI ដឹកដើមឬស្សី ដូមបំភ្លឺជូនសាធារណជន និងអ្នកសារព័ត៌មាន ចំពោះករណីគ្រោះថ្នាក់ចរាចរណ៍ ដែលបណ្ដាលឱ្យមានមនុស្សម្នាក់ស្លាប់នៅចំណុចផ្លូវលេខ៥៤ ស្ថិតក្នុងភូមិទី៤ ឃុំកំពង់លួង ស្រុកក្រគរ ខេត្ដពោធិសាត់ដូចខាងក្រោម។
យើងខ្ញុំសូមជម្រាបជូនថា កាលពីវេលាម៉ោង២ នឹង១៥នាទីយប់ ថ្ងៃទី២៥ ខែកក្កដា ឆ្នាំ ២០២៣ នៅលើផ្លូវលេខ៥៤ ស្ថិតក្នុងភូមិទី៤ ឃុំកំពង់លួង ស្រុកក្រគរ ខេត្ដពោធិសាត់ មានគ្រោះថ្នាក់ចរាចរណ៍មួយបានកើតឡើង ដោយមានរថយន្តម៉ាក TOYOTA RAIZE ពាក់ស្លាកលេខភ្នំពេញ 2A-2468 ពណ៌ស សេរីឆ្នាំ២០២៣ បានបើកទៅបុកពីខាងក្រោយរថយន្តរបស់យើងខ្ញុំម៉ាក HYUNDAI ពណ៌ស ពាក់ផ្លាកលេខ កំពង់ធំ 3A-1280 ខណៈកំពុងធ្វើបើកបរស្របទិសពីកើតទៅលិខនៅលើកំណាត់ផ្លូវជាតិលេខ៥។
នៅក្នុងហេតុការណ៍នោះ បានបណ្ដាលជនរងគ្រោះម្នាក់ឈ្មោះ ដួង ចន្ថា ភេទប្រុស អាយុ៣៧ឆ្នាំ ជនជាតិខ្មែរមុខរបរពេទ្យធ្មេញរស់នៅសង្កាត់ទន្លេបាសាក់ ខណ្ឌចំការមន រាជធានីភ្នំពេញស្លាប់នៅកន្លែងហ្នឹងកើតហេតុ។
ប្រភពពីកន្លែងកើតហេតុបានបញ្ជាក់ថា ក្រោយពីបើកបុកពីខាងក្រោយរថយន្តរបស់យើងខ្ញុំដែលដឹកឫស្សី នៅលើកំណាត់ផ្លូវជាតិលេខ៥ ស្ថិតនៅក្នុង រថយន្តម៉ាក TOYOTA RAIZE
បានកៀបជាប់ពីខាងក្រោយដោយតៃកុងរថយន្តដឹកឫស្សីរបស់យើងខ្ញុំ មិនបានដឹងនោះទេ។
លុះរថយន្តដឹកឫស្សីបត់ចូលផ្លូវលេខ៥៤ ស្ថិតក្នុងភូមិទី៤ ឃុំកំពង់លួង ស្រុកក្រគរ ខេត្ដពោធិសាត់ បានប្រមាណជា៥គីឡូម៉ែត្រ ទើបប្រជាពលរដ្ឋឃើញ ក៏ស្រែកប្រាប់ទៅតៃកុងឡានដឹកឫស្សី ថាមានរថយន្តបុកកៀបជាប់ពីខាងក្រោយទើបតៃកុងឡានរបស់យើងខ្ញុំបានដឹង។
ពេលនោះ គឺតៃកុងរថយន្តម៉ាក TOYOTA RAIZE បានស្លាប់បាត់ហើយ ដោយមានការបារម្ភពីសុវត្ថិភាពទើបតៃកុងឡានដឹកឫស្សីរបស់យើងខ្ញុំ បានគេចចេញពីកន្លែងកើតហេតុភ្លាមៗ។
ក្រោយកើតហេតុសមត្ថកិច្ចជំនាញ បានយករថយន្តទាំង ២គ្រឿងទៅរក្សាទុក្ខ និងកសាងសំណុំរឿងបញ្ជូនទៅតុលាការដើម្បីចាត់ការតាមផ្លូវច្បាប់។ ដោយឡែកចំពោះរថយន្តម៉ាក TOYOTA RAIZE តុលាការបានសម្រេចប្រគល់ជូនភាគីរងគ្រោះវិញហើយ។
ចំពោះករណីខាងលើនេះ យើងខ្ញុំជាភាគីម្ចាស់រថយន្តដឹកឫស្សីម៉ាក HYUNDAI បានខិតខំរិះរកមធ្យោបាយគ្រប់រូបភាពដើម្បីបញ្ចប់វិវាទមួយនេះ ដោយសន្តិវិធី ដោយព្រមប្រគល់សំណងជំងឺចិត្តជូនភាគីរងគ្រោះ ចំនួន ៥០០០ដុល្លារសហរដ្ឋអាមេរិក ប៉ុន្តែភាគីរងគ្រោះមិនព្រមទទួលដោយទាមទារជំងឺចិត្តចំនួន ២ម៉ឺនដុល្លារសហរដ្ឋអាមេរិក។ បច្ចុប្បន្ន ភាគីយើងខ្ញុំនៅតែរក្សាគោលជំហរសងសំណងទៅភាគីរងគ្រោះជានិច្ច មិនមានការគេចវេះឡើយ។
ចំពោះការលើកឡើងថា រថយន្តដឹកឫស្សីរបស់យើងខ្ញុំថា៖ ដឹកដោយមិនមានការដាក់ស្លាកសញ្ញាពីខាងក្រោយ, រថយន្តរបស់យើងខ្ញុំខូចនៅលើដងផ្លូវតូចចង្អៀត, រថយន្តរបស់យើងខ្ញុំឈប់ចូលលេងផ្ទះបងប្អូន គឺជារឿងមិនពិតនោះទេ។
យើងខ្ញុំសូមជម្រាបថា រថយន្តរបស់យើងខ្ញុំ មាមានការដាក់ស្លាកសញ្ញាពីខាងក្រោយត្រឹមត្រូវតាមកំណត់ច្បាប់, រថយន្តរបស់យើងខ្ញុំមិនបានខូច និងចតនៅលើដងផ្លូវតូចចង្អៀត (ផ្លូវលេខ៥៤)ទេ ហើយតៃកុងរថយន្តរបស់យើងខ្ញុំក៏មិនបានឈប់ចូលលេងផ្ទះបងប្អូនទាំងកណ្ដាលអធ្រាត្រនៅក្បែរផ្លូវលេខ៥៤នោះទេព្រោះតៃកុងឡានយើងខ្ញុំគ្មានសាច់ញាតិនៅម្ដុំនោះឡើយ។
ឆ្លៀតក្នុងឱកាសនេះ យើងខ្ញុំជាភាគីរថយន្តដឹកឫស្សី ក៏សូមអរគុណបងប្អូនសាធារណជន និងអ្នកសារព័ត៌មានទាំងអស់ ដែលបានខិតខំឈឺឆ្អាលក្នុងករណីគ្រោះថ្នាក់ចរាចរណ៍មួយនេះ។ ក្នុងនាមយើងខ្ញុំជាអាជីវក និងជាម្ចាស់រថយន្ត មិនមានបំណងណាមួយឱ្យរឿងនេះកើតឡើងឡើយ គឺវាជារឿងកើតឡើងដោយយថាហេតុ និងដោយអចេតនា។ ដូច្នេះយើងខ្ញុំក៏សូមចូលរួមសោកស្ដាយ និងរំលែកទុក្ខចំពោះគ្រួសារសពដែលបានបាត់បង់សមាជិកគ្រួសារជាទីស្រលាញ់ផង៕
